Бүгін №10 қалалық емханада Алматы қаласының Әуезов ауданына қарасты мемлекеттік және жекеменшік емханаларының эпидемиолог және инфекционист дәрігерлеріне арналған маңызды семинар өтті. Іс-шараның негізгі тақырыбы — дифтерияның алдын алу және індет қаупін төмендету жолдары.
Семинарға қаладағы медициналық ұйымдардан келген мамандар қатысып, тәжірибе алмасып, өз білімдерін жетілдіруге мүмкіндік алды.
Жиынды ашқан Әуезов ауданының санитариялық-эпидемиологиялық бақылау басқармасының эпидемиологиялық бақылау бөлімінің басшысы Айгүл Жақыпова өңірдегі эпидемиологиялық ахуал туралы ақпарат беріп, дифтерияның таралу қаупіне және алдын алу шараларын қатаң сақтаудың маңыздылығына тоқталды.
Одан кейін сөз алған С.Ж. Асфендияров атындағы Қазақ ұлттық медицина университетінің инфекциялық және тропикалық аурулар кафедрасының доценті Михаил Одноралов дифтерияның клиникалық белгілері, аурудың ағымы, диагностикасы және заманауи емдеу әдістері бойынша жан-жақты мәлімет берді. Сонымен қатар нақты клиникалық жағдайлар талқыланып, тиімді практикалық тактикалар ұсынылды.
Семинар барысында қатысушылар сұрақтар қойып, өзара пікір алмасып, практикалық кеңестер алды. Шараның басты мақсаты — қала дәрігерлерінің кәсіби біліктілігін арттыру және қауіпті инфекцияның алдын алуда бірлескен жұмысты нығайту.
Іс-шара қорытындысында мамандар қоғамдық денсаулықты қорғау саласындағы осындай кездесулердің маңыздылығын атап, алдағы уақытта да ынтымақтастықты жалғастыруға дайын екендерін білдірді.
